কলমদরের খোলা চিঠি-৩৪
সাপ্তাহিক কমলগঞ্জ সংবাদ পত্রিকার হখল পাঠক বইন ও ভাইপয়লা হখলরে মর সালাম আর আদাব জানাই।
দিন কাটারা ছহি-ছালামতে ই আশা মনে,
মুইও আছি একলাখান আপনারার দোয়ার গুণে।
জানইন জানি আইছে মার্চ. স্বাধীনতার মাস,
‘৭১ অর যে মাসো গড়িয়া উঠছে বাঙালীর ইতিহাস।
“এবারের সংগ্রাম. মুক্তির সংগ্রাম. এবারের সংগ্রাম. স্বাধীনতার সংগ্রাম ”
৭ মার্চোর রেসকোর্স ময়দানো, সহজে কি ভুলিলাইলাম?
পাকিস্তানীর চামচা চাড়াল রাজাকার আল বদর আর শান্তি কমিটির মেম্বার অখলে
৭১অ যিতা করছইন, খুুন ধর্ষন রাহাজানি,--যায়নি ভুলা হলে?
তিরিশ লাখ বুকর রক্তে কিনা বাংলাদেশো ৪২ বছর ধরি,
দেশবিরোধী জামাত-শিবির, পাক-হানাদারোর উত্তরসূরী.
সাঈদী-সাকা,গোলামআজম, নিযামী, কামরুজ্জামান
খুন,ধর্ষণ,সন্ত্রাসী আর লুট কররা সহায় সম্পদ, মুসলমানর ঈমান।
আইজ যখন আদালতো চলের তারার বিচার,
বিচার আচার নষ্ট করাত জিনছইন রাজাকার।
ভাঙ্গা ভাঙ্গা সিলেটি ভাষার ছন্দে ছড়ায় ই হপ্তার কলমদরোর চিঠি আপনারার দরবারো নিবেদন করলাম। আশা করি মুই অধম অভাজন বকলম নাখান্দা নালায়েখ বিয়াক্কল কলমদরোর কথায় কেউ আঘাত পাইলে নিজ গুনে মাফ করবা। আইজ অউ পর্যন্তই থাখউক।
ইতি-
কমলগঞ্জ উপজিলার লাখো মানুষর পক্ষে
মুই অধম অভাজন নাখান্দা নালায়েক
কলমদর
kolomdor1@gmail.com
কলমদরের খোলা চিঠি-৩৩
পয়লা
সাপ্তাহিক কমলগঞ্জ সংবাদ পত্রিকার হখল পাঠক ভাই বেরাদর আর বইন বইনান্তরে
মর সালাম-আদাব জানাইয়া ই- হপ্তার কলমদরোর চিঠি আপনাইন্তর দরবারো নিবেদন
কররাম। আশা করি আল্লাহর রহমতে ছহি-ছালামতেই দিন কাটারা। মুইও আছি আপনারার
দোয়ার বরকতে ভালা-বুরায় মিলাইয়া। জামাত-শিবির’র রাজনীতি নিষিদ্ধ করা,
রাজাকার, যুদ্ধাপরাধীর ফাঁসি, জঙ্গিবাদী অপতৎপরতা নির্মুল ইতা নানান দাবীতে
দেশ’র লাখো কোটি গণ-মাইনষর লগে মন, মত আর সুর মিলাইয়া ই-হপ্তার চিঠি
নয়াজমানার ২য় মুক্তিযোদ্ধাহখলোর নামে উৎসর্গ করলাম। শাহবাগ জাগরণ মঞ্চ’র
জোয়ার আইজ দেশো বিদেশো গোটা বাঙালী জাতির বিবেক জাগাইয়া তুলছে। ’৭১ সাল
থাকিয়া ২০১৩ সাল ৪২ বছর পর্যন্ত যে অমানুষ’র দল রাজাকার, যুদ্ধাপরাধী
জামাত-শিবির, তারার গডফাদার না ডগফাদার’র ইশারায় মদদে ধর্মর নামে আর
লেবাসে এ দেশর মাইনষরে খুন ধর্ষণ নানান জুলুম নির্যাতনকরিয়া আর, সময় আইছে
এরারে চিরতরে নির্মূল করার। গেল জুম্মাবার দিন অউ ধর্মীয় লেবাসধারী
মার্কা মারা জালিম নাছারার দলে পবিত্র বায়তুল মোকাররম জাতীয় মসজিদ’র
ভিতরে আগুন ধরাইয়া.সাংবাদিক আর পুলিশবাইয়াইন্তর উপরে যে আক্রমণ করছে, ইটা
কোন্ ধর্মত্ আছে কউকাছাইন দেখি। শহীদ মিনার ভাংচুর, জাতীয় পতাকা
জ্বালাইয়া সারা দেশো যে তান্ডব করলা, আউকা দল-মত ছাড়া আমরা হখল দল, মত আর
শ্রেণী-পেশার মানুষ একাট্টা ই-সব কমিন-কমজাত্ খুনী লোচ্ছা পাকিস্তানী ফেরত
অখলরে সামাজিক, রাজনৈতিক ভাবে বয়কট করি। আইজ হিরবার জামাত-শিবির রাজনীতি
নিষিদ্ধ করা, যুদ্ধাপরাধীর ফাঁসি ইতা গণ মাইনষর দাবীর লগে একমত অইয়া
ই-হপ্তার কলমদরোর চিঠির ইতি টানলাম।
কলমদরের খোলা চিঠি-৩২
সাপ্তাহিক কমলগঞ্জ সংবাদ পত্রিকার হখল পাঠক ভাই বেরাদর আর বইন বইনারী হখলরে সালাম আদাব জানাইয়া ই হপ্তার কলমদরোর চিঠি আপনারার দরবারো নিবেদন কররাম। আশা করি আপনারা আছইন ছহি ছালামতে। মর ভাঙ্গা ভাঙ্গা সিলোটি ভাষার কাচা আতোর চিঠি পড়ইন হমানে। মুই চিঠির মাঝে কমলগঞ্জোর হাল হকিকত তুলিয়া ধরার চেষ্টা করি। আইজ কাইল যুদ্ধাপরাধীরর ফাসির দাবি লইয়া এক্কেরে শাহবাগ থাকিয়া সিলেট টেকনাফ থাকি তেতুলিয়া যে জাগরণ শুরু অইছে অউ জাগরণ’র জোয়ারে কমলগঞ্জ উপজিলার আদমপুর শমশের নগর নানান জেগাত ছাত্র-গণ অবস্থান, মানব বন্ধন, মিটিং-মিছিল অইছে। শহীদ মিনার’র ছাত্র-গণ অবস্থান কর্মসূচীত গেলো হাপ্তাত বাদ হাইঞ্জা সহমত জানাইছন আইয়া মুক্তিযুদ্ধ’র অন্যতম সংগঠক সাবেক আদমপুর ইউপি চেয়ারম্যান মরহুম সবুর সাব’র গির্তাইন আমরার ইলিয়াস এম.পির বইনে। তাইন মুক্তিযুদ্ধ’র জাগ্রত মঞ্চরে বাংলাদেশ’র মানচিত্র আঁকা জাতীয় পতাকা উপহার দিলা । ইয়ো নির্বাচন কমিশন তরফে জানলাম, মৌলভীবাজার-২ আসন থাকি আদমপুর, ইসলামপুর আলীনগর, শমশেরনগর চাইরো ইউনিয়ন অখন থাকিয়া মৌলভীবাজার ৪ আসন অর্থাৎ কমলগঞ্জ-শ্রীমঙ্গল নির্বাচনী এলাকাত ভাঙ্গিয়া কইলে নৌকা মার্কার আসনো আরো ভাঙ্গিয়া কইলে জাতীয় সংসদ’র চীফ হুইপ শহীদ স্যার’র আসনো আইছে। অবশ্যি আগামী মাসোর ১০ তারিখ পরে বিষয়টা ফাইন্যাল অইবো। অউ চার ইউনিয়ন লইয়া অখন ভোট’র নয়া হিসাব নিকাশ অইবো। পায়-পত্রিকা আর নানান পেশার মাইনষর মূখ থাকিয়া বুঝা যায়, অতদিন ধরিয়া অউ চার ইউনিয়ন মহাজোটর এম.পি নওয়াব আলী খাঁন সাবোর মেমান আছিল। মেমান পুরান অইয়া যেই ঘর’র গিরস্থ এম.পি সাব’র লগে বাইল জমাইলা এই নিজোর বাড়ীত ফিরিয়া গেলাগী। বাড়ীর মানুষ বাড়ীত আইয়া যিলান খুশি অইছন মেমান ইসাবে হিজাত আদর যতœ না পাওয়ারো রাগ আছে চার ইউনিয়ন’র লাখও মাইনষর মনো। অখন আমরা আশা কররাম বাড়ীর গিরস্থ আমরার মাননীয় চীফ হুইপ সাবে আমরার অতদিনোর জ্বালা যন্ত্রণা মুছিয়া দিবা। অউ চিঠি যখন লেখরাম আমরার ইউএনও সাব প্রকাশ কান্তি চৌধুরী আমরার গেছ থোকি বিদায় নিয়া মৌলভীবাজার’র এডিসি হিসাবে জয়েন করছইন। খাটি মনোর মাটির মানুষ শহীদ পরিবারো সন্তান প্রাকাশ কান্তি বাবুয়ে কমলগঞ্জ’র মাটি-মানুষ’র প্রতি যে ভালবাসা দেখাইছন ইতা মর ভাষায় প্রকাশ করা যার না। আল্লাহ তায়ালায় তাইনরে আরো ইজ্জত, আরো সুখ, আরো শান্তি দেউকা। কলমদরোর চিঠির একজন রেগুলার পাঠক ইউএনও সাব অখনো কলমদররে ভূলতা নায়, এ আশা আর বিশ্বাস মর আছে। একট ভালা নিউজ দিয়া ই হপ্তার কলমদরোর চিঠি শেষ করতাম চারাম। নিউজটা অইলো আপনার আমার প্রিয় সপ্তাহিক কমলগঞ্জ সংবাদ অখন অনলাইনো দেখা যায়। কমলগঞ্জ সংবাদ পত্রিকার একজন শুভাকাঙ্খী মৌলভীবাজার সবুজ কুড়ি কম্পিউটার’র মালিক বারমাইয়া আসি মূখর পুলক বাবুয়ে ঠিকানা কইলা www.kamalgonjsangbad.blogspot.com। আপনারা অউ ঠিকানায় গেলে কমলগঞ্জ সংবাদ পত্রিকা দেখতা পারবা।
আইজ অউ পর্যন্তই থাখউক।
কলমদরের খোলা চিঠি-৩১
ফাঁসি ফাঁসি ফাঁসি চাইযুদ্ধাপরাধীর ফাঁসি চাই
শাহবাগ স্কয়ার’র জন সমুদ্র থাকিয়া গোটা দেশ যিলান যুদ্ধাপরাধী দাবি লইয়া উত্তাল অইছে ইলান ফাসিঁর দাবী লইয়া পয়লা সাপ্তাকি কমলগঞ্জ সংবাদ পত্রিকার হখল পাঠক ভাই বইনরে মর সালাম আদাব জানাইয়া ই হপ্তাহ’র কলমদরোর খোলা চিঠি আরম্ভ কররাম। আশা কার আপনারা আল্লাহর রহমতে ছহি ছালামতে থাকিয়া নয় জমানার পুয়াইন পুড়িন্তর দাবীর লগে এক মত আছইন আর নিজ নিজ এলাকার জনমত গড়িয়া তুলরা। আমরার কমলগঞ্জ’র এ জমানার পুয়াইন পুড়িন্তে মুক্তিযোদ্ধের জগ্রত মঞ্চ ব্যণারে গেলো শনিবার থাকিয়া ভানুগাছ চৌমূহনা আর শহীদ মিনার চত্বর ছাত্র গণ অবস্থারন আরম্ভ করছইন। পয়লা দিনই গোটা উপজিলার হখল শ্রেণী পেশার কয়েক আজার মাইনষর সমাগম অইছে। সাংবাদিক শাব্বির এলাহীর মূল উদ্যোগে আরম্ভ অওয়া অউ গন জমায়েত গান বাজনা কবিতা আবৃত্তি আর মিছিলে স্লোগানে ৭১ ও রাজাকার যুদ্ধাপরাধীর ফাসির দাবীতে মূখর অইগেছে ভানুগাছ। খবর পাইলাম এদিন আদমপুর পতনউষার নানান জেগাত মিছিলে স্লোগানে একই দাবীতে এ কর্মসূচী পালন অইছে। মুক্তিযোদ্ধের জাগ্রত মঞ্চ’র ছাত্র গণঅবস্থানো মুক্তিযোদ্ধা, লেখক-সাংবাদিক, সংস্কৃতিকর্মী, ব্যবসায়ী, রাজনীতিবিদ, শিক্ষক হখলে সহমত জানাইছন। ক-তে কাদের মোল্লা, গ-তে গো-আজম, স-তে সাকা চৌ, ইতা নানান স্লোগানে মূখর মুক্তিযোদ্ধের জগ্রত মঞ্চ’ত বাদ এশা জাতীয় সংসদ’র চীফ হুইপ বীর মুক্তিযোদ্ধা আলহাজ উপাধ্যক্ষ আব্দুস শহীদ এমপি আইয়া হখলরে ধন্যবাদ জানাইয়া একাত্মতা ঘোষনা করলা। বিয়াল থাকিয়া আব্দুর রহমান বয়াতি বিথিকা চন্দ এস এম আতিকুর রহমান, ব্র্যাক আনোয়ার, এরার গণ সংগীত, সহ নানান পেশার মাইনষ’র ছন্দ মিলাইল স্লোগানে আর কবিতা আবৃত্তিয়ে রাইত নয়টা পর্যন্ত ছাত্র গণ অবস্থান কর্মসূচীত আরো যেরা একাত্মতা পোষন করছইন আর নানান ভাবে সহযোগীতা করছইন তারা হখলরে ধন্যবাদ আর কৃতজ্ঞতা জানাইলা মুক্তিযোদ্ধের জাগ্রত মঞ্চ’র উদ্যোক্তা বিআরডিবি চেয়ারম্যান ইমতিয়াজ আহমদ বুলবুল, কমলগঞ্জ সংবাদ পত্রিকার সম্পাদক মোঃ সানোয়ার হোসেন, সমকাল সূহৃদ সমাবেশ কমলগঞ্জ উপজেলা শাখার সভাপতি শাব্বির এলাহী আর কমলগঞ্জ’র কাগজ পত্রিকার সম্পাদক শাহিন আহমদ-এ। কমলগঞ্জ সংবাদ পত্রিকার তরফ থাকি মুই অধম অভাজন কলমদরেও যুদ্ধাপরাদীর ফাসিঁর দাবী লইয়া ই কর্মসূচীর উদ্যোক্তা আর কমলগঞ্জোর হখল বয়সোর হখলরে অন্তরোর ধন্যবাদ জানারাম। মুইও যুদ্ধাপরাদীর ফাসিঁর দাবী লইয়া ই হপ্তার কলমদরোর চিঠি নিবেদন করিয়া বিদায় নিলাম।
কলমদরের খোলা চিঠি-৩০
সাপ্তাহিক কমলগঞ্জ সংবাদ পত্রিকার হখল পাঠক ভাই বেরাদর আর বইন বইনারী হখলরে সালাম আদাব জানাইয়া ই হপ্তার কলমদরের খোলা চিঠি আপনারার দরবারো নিবেদন কররাম। আশা করি আপনারা আছইন ছহি ছালামতে। মর ভাঙ্গা ভাঙ্গা সিলোটি ভাষার কাচা আতোর চিঠি পড়ইন হমানে। মুই চিঠির মাঝে কমলগঞ্জোর হাল হকিকত তুলিয়া ধরার চেষ্টা করি। আশা করি আপনারার কিছুটা ফায়দা অয়। মুই কিন্তুক মর ব্যক্তিগত কোনু মত কলমদরোর চিঠিত পেশ করার চেষ্টা করছি না আইজ পর্যন্ত। আপনারার মতামত, বক্তব্যই কলমদরোর কথা। এর লাগি কমলগঞ্জ সংবাদ পত্রিকার সম্পাদক সায়েবরে ধন্যবাদ ও কৃতজ্ঞতা না জানাইলে নিমকহারামী অইবো। তাইনতাইনোর পত্রিকাত্ কলমদররে চিঠি লেখার সুযোগ দেওয়ায় আপনাইন্তর লগে মন আর মত বিনিময় করতাম পাররাম। ভূলে বেভূলে বেমারে আজারে কোনু হপ্তাত কলমদরোর চিঠি না থাকলে আপনারা যিলান বেহুশ অইন মুইও বুঝতাম পারি কলমদরে আপনারার কইলজা কিলান খাড়ছে। মরও দায়বোধ জন্মে বস্তু নিষ্ট, সৎ আর নিরপে দরকারী বিষয় আষয় নিয়া চিঠি লেখার লাগী। অখন ধান ভাংগতে গাজীর গীত গাইয়া হুদা বেহুদা নিজর ঢোল বাজাইলে তো আর আপনারা ইলান বেহুশ অইলা নানে। কমলগ্জ সংবাদ পত্রিকা তো আর কেউরির ব্যাক্তিগত সম্পদ রইছে না। না সম্পাদক’র, না কলমদরোর। সম্পাদক’র লাখান মুইও মনো করি এ পত্রিকা তার জন্ম লগ্ন থাকিয়া মাটির কথা, মাইনষর কথা, দেশ ও দশোর কথা, সুখ-দুঃখ আহাজারী, উন্নয়ন অর্জন তুলিয়া ধরের ইলান হেদিন থাকিয়া এ পত্রিকা দেশ, দশ, মাটি আর মাইনষ’র পত্রিকা অইগেছে। যিতা মনে লয় ইতা লেখিলাইলাম আর অইগেলামগি কলাম লেখক কলাম সৈনিক। আইজ কাইল নিজর ঢোল পিঠানির লাগী গলাত ঢোল একটা বান্দিয়া অ চৌমূহনা আর হ চৌমূহনাত--
এন করেংগা থেন করেংগা
মুই অইলাম নবাবজাদা
বাপর নাম শাহাজাদা
বাড়ী অইলো আড়েংগা।
ইতা করা লাগে না। মুই বকলম কলমদরোর লাখান নিজ’র গুণ কির্তন করা যায় কলম আর নিউজপ্রিন্ট’র কাগজ লইয়া । কিন্তুক একটা পত্রিকা তো আর নিউজ প্রিন্ট’র খাতা নায়। হাছায় মিছায় জিতা মনে ছায় মর লেখার খছড়া খাতা। এমলান অইলেতো কমলগঞ্জ সংবাদ পত্রিকার সম্পাদক মোঃ সানোয়ার হোসেন সায়বেও লেখতা পারতা। কিন্তুক আপনে আমি পকেট’র টেকা দিয়া পত্রিকা কিনিয়া আর বিজ্ঞাপন দিয়া ইতা পড়তাম পাতাম নায়। তেও এন করেংগা তেন করেংগা কিছু কলমবাজ অখলোর কলমদরি দেখিয়া মনো বড় আপে লাগে। কুরুচির কুকীর্তনে ভরা লেখা পড়িয়া পেট পাখায়। তারা এমন ভাব করের যেমন কমলগঞ্জ উপজিলারে তারাই স্বাধীন করছে। নয়া যোগী তাঁতও উঠছইন- সাধুরে কইন সন্ন্যাসী আর ভাতরে কইন অন্ন। আচ্ছা কইনছাইন এ তাল-মাল কিতা। সাংবাদিকতার লাখান লেখালেখিও একটা মহৎ কাজ। আরেক জনোর মিছা বদনাম গাইয়া নিজে সূফী সাব সাজিয়া নাম কুড়ানির চেষ্টায় যে লেখালেখি অয় অউ লেখালেখি আর লেখক যে কতো মহান -পাঠক মাত্রই বুঝতা পারইন। ইতা নান্দিবাসী করিয়া লেখক সাংবাদিক আর পত্রিকার মান না ডুবানির লাগী মুই একজন নগন্য পাঠক হিসাবে হিজাত মহান সাংবাদিক আর কলাম লেখক অখলরে অনুরোধ কররাম।
কলমদরের খোলা চিঠি-২৯
সাপ্তাহিক কমলগঞ্জ সংবাদ পত্রিকার হখল পাঠক ভাই বেরাদর আর বইন বইনারী হখলরে সালাম আদাব জানাইয়া ই হপ্তার কলমদরোর চিঠি আপনারার দরবারো নিবেদন কররাম। আশা করি আপনারা আছইন ছহি ছালামতে। মর ভাঙ্গা ভাঙ্গা সিলোটি ভাষার কাচা আতোর চিঠি পড়ইন হমানে। মুই চিঠির মাঝে কমলগঞ্জোর হাল হকিকত তুলিয়া ধরার চেষ্টা করি। জানিনা আপনারার কতখান ফায়দা অর। তো কায়দা করিয়া কেই যদি ফায়দা নেয়। মুই কিন্তুক কুনতা কইতাম পারতাম নায়। আইজ ইসলামপুর ডালুছড়া জুনিয়র হাই স্কুলো গিয়া ছাত্র-ছাত্রী অখলোর দুরাবস্থা দেখিয়া আইলাম। ১৮৪ জন ছাত্র-ছাত্রীয়ে কুব কষ্ট করিয়া পড়রা। স্কুলোর হেড মাস্টার সুবাস বাবু-এ কইলা ছাত্র-ছাত্রী বইয়া পড়ার ব্রেঞ্চ কুব কম। ভাঙ্গা বেড়ার ফাকে দি হির হির হীম বাতাস হামাইয়া ও শীতোর মাঝে কাপাইয়া তুলে। ২০০২ খ্রিষ্টাব্দে বউত আশা লইয়া এলাকাবাসীয়ে এ স্কুল প্রতিষ্টা করছিলা। কালারায়বিল গ্রামোর হাজী কামরুজ্জামান সাবোর দেওয়া ষাট শতক, ডাঃ রবিন্দ্র কুমার সিংহ’র দেওয়া কুড়ি শতক আর স্কুলোর রাস্তার লাগি সুলতান আহমদোর দেওয়া এক শতক মোট একাশী শতক ভূমি লইয়া প্রতিষ্টিত ডালুুয়াছড়া জুনিয়র হাই স্কুল আইজ পর্যন্ত এমপিওভুক্ত না অওয়ায় সরকারী নানান সুযোগ সুবিধা থাকিয়া বঞ্চিত এ স্কুলোর শিক্ষক আর শিক্ষার্থী অখল। ছাত্র বেতন দিয়া কোনও রকম স্কুলোর খায় খরছ চালানি অর। অউ স্কুলোর এমপিওভুক্তি করার লাগী শিক্ষামন্ত্রীর গেছে বার বার আবেদন নিবেদন করা অইছে। মাননীয় চিফ হুইপ আলহাজ উপাধ্যক্ষ আব্দুস শহীদ এম.পি আর মাননীয় এম.পি নওয়াব আলী আব্বাছ খাঁন সায়বেও এমপিওভুক্তির লাগি সুপারিশ করছইন। তারা অ স্কুলোর উন্নয়নো যে সহযোগীতা করছইন ইটাও ভূলার নায়। এলাকাবাসীয়ে আশা কররা মাননীয় চিফ হুইপ, আমরার এমপি সাবে আর সংশ্লিষ্ট বিভাগোর সহযোগীতায় এ স্কুল কুব জলদি আলোর মূখ দেখবো। আর মুই কলমদরে আমরার ইউএনও সাবরে একদিন সময় করিয়া ডালুয়া ছড়া স্কুলো গিয়া ছাত্র-ছাত্রীর বইয়া পড়ার দূরাবস্থা দেখার অনুরোধ কররাম। অল্প কয়েক জোড়া বেঞ্চ অইলেই কিন্তু এই সমস্যার সমাধান অই যায়। পয়লা যে কথা কইছলাম কায়দা করিয়া ফায়দা নেওয়ার কথা আমরার জনপ্রতিনিধি অখলে জিলান কায়দা করিয়া ভোট নেইন মুই আশা করি ইলান শিক্ষা প্রতিষ্টানে কায়দা করিয়া হখলোর ফায়দা নিতো পারবো তারার গেছ থাকি। আশা করি মুই অধম অভাজন বকলম নাখান্দা নালায়েখ বিয়াক্কল কলমদরোর কথায় কেউ আঘাত পাইলে নিজ গুনে মাফ করবা। আইজ অউ পর্যন্তই থাখউক।